مشاهدة النسخة كاملة : رباعيات صلاح جاهين
أمل صلاح
11/16/2008, 02:47 AM
خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي !!!
ـــــــــــــــــــــــــ
ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!
ـــــــــــــــــــــــــ
ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي !!
أمل صلاح
11/16/2008, 02:48 AM
و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي !!!
ـــــــــــــــــــــــ
أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!
ـــــــــــــــــــــــــــــ
يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!!
أمل صلاح
11/16/2008, 02:50 AM
أحب أعيش ولو في الغابات
أصحي كما ولدتني أمي و ابات
طائر .. حوان.. حشرة .. بشر ..بس أعيش
محلا الحياة.. حتي في هيئة نبات
عجبي !!
ـــــــــــــــــــــ
سهير ليالي و ياما لفيت و طفت
و ف ليه راجع في الضلام قمت شفت
الخوف ... كأنه كلب سد الطريق
و كنت عاوز أقتله .. بس خفت
عجبي !!
ــــــــــــــــــــــــ
كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي !!
أمل صلاح
11/16/2008, 02:52 AM
عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي !!!
ــــــــــــــــــــــــــ
رقبه قزازة و قلبي فيها انحشر
شربت كاس و اتنين و خامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبي !!!!
ـــــــــــــــــــــــ
ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!
أمل صلاح
11/16/2008, 02:53 AM
ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي !!!
ــــــــــــــــــــ
نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
عجبي !!
ــــــــــــــــــــــــ
علي رجلي دم .. نظرت له ما احتملت
علي إيدي دم.. سألت ليه ؟ لم وصلت
علي كتفي دم.. و حتي علي رأسي دم
أنا كلي دم .. قتلت ؟ ..... والا اتقتلت
عجبي !!
أمل صلاح
11/16/2008, 02:55 AM
انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!!
ــــــــــــــــــــــــــــ
ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
عجبي !!!!
ـــــــــــــــــــــــ
يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
عجبي !!!
أمل صلاح
11/16/2008, 02:56 AM
شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني .... و إيه العمل
عجبي !!!
ــــــــــــــــ
أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي !!
ــــــــــــــــــ
إيش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!
أمل صلاح
11/16/2008, 02:57 AM
إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي !!!
ـــــــــــــــــــــ
يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
عجبي !!!!
ــــــــــــــــــ
في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ و لا وصلت للفلسفة
عجبي !!!
أمل صلاح
11/16/2008, 02:57 AM
الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
عجبي !!!
ــــــــــــــــــــــــ
علي بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا
عجبي !!
ـــــــــــــــــ
إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!
أمل صلاح
11/16/2008, 02:59 AM
نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير
عجبي !!!
ـــــــــــــــــــــــــ
- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف
عجبي !!!!
ـــــــــــــــــــــــ
السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
عجبي !!!
أمل صلاح
11/16/2008, 03:00 AM
وقفت بين شطين علي قنطــــــرة
الكدب فين و الصدق فيـــن يا تري
محتار ح اموت .. الحوت خرج لي وقالي
هو الكلام يتقــــاس بالمســــطرة
عجبي !!!
ــــــــــــــــــــــ
سرداب في مستشفي الولاده طويل
صرخات عذاب ورا كل باب وعويل
.. وفي الطــــــريق متزوقين البنات
متزوقـــــــــــــين للحب و المواويل
عجبي !!
ـــــــــــــــــــ
الدنيا أوده كـــــبيره للانتظار
فيها ابن أدم زيه زي الحــــمار
الهم واحد .. و الملل مشــــترك
و مفيش حمار بيحاول الانتـــحار
عجبي !!
أمل صلاح
11/16/2008, 03:02 AM
أيوب رماه البين بكل العـــــلل
سبع سنين مرضان وعنده شلل
الصــــبر طيب .. صبر أيوب شفاه
بس الأكـــــــــاده مات بفعل الملل
عجبي !!!
ـــــــــــــــــــــ
نسمة ربيع لكن بتكوي الوشـــوش
طيور جميلة بس من غير عشـــوش
قلوب بتخفق إنما وحـــــدها
هي الحياه كده .. كلها في الفاشوش
عجبي !!!!
ــــــــــــــــــــــــ
يا طير يا عالي في الســــــما طظ فيك
ما تفتكرشي ربنا مصطـــــفيك
برضـــــك بتاكل دود و للطين تعًًًًودً
تمــص فيه يا حلو .. و يمص فيك
عجبي !!!
أمل صلاح
11/16/2008, 03:03 AM
كروان جريح مضروب شعاع م القمر
سقط من السموات فؤاده انكســـــر
جريت عليه قطه علشان تبلعــــــه
أتاريه خيال شعراء و مالهـــــوش أثر
عجبي !!!
ـــــــــــــــــــــ
ياللي نصحت الناس بشـــــرب النبيت
مع بنت حلوه .. وعود , وضحك , وحديت
مش كنت تنصحهم منين يكســـــــــبوا
تمن ده كله ؟ ... و الا يمكن نســـــــيت
عجبي !!
ـــــــــــــــــــ
ما حد في الدنيا واخد جزاتــــــه
و لا حـــــد بيفكر في غير لذاذاته
ما تعرفيش يا حبيبتي .. أنا و انتي مين؟
إنتي عروس النيل ... و أنا النيل بذاته
عجبي !!
أمل صلاح
11/16/2008, 03:04 AM
رقاصه خرسا و رقصه من غير نغــم
دنيا . . يا مين يصالحها قبل النـــدم
ساعتين تهز بوجههـــــا يعنـي
يترجرجوا نهديها يعني نعـــــم
عجبي !!!
ـــــــــــــــــــ
إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الـــــفرس
الدنيا قالت .. قام خطفها الشيطان
عجبي !!!!
ـــــــــــــــــــــــــــــــ
من بين شقوق الشيش و شقشقت لك
مع شهقة العصافير و زقزقــــت لك
نهار جديد انا . . قوم نشوف نعــمليه
انا قلت يا ح تقتلني .. يا ح اقـــتلك
عجبي !!!
أمل صلاح
11/16/2008, 03:06 AM
جالك أوان ووقفت موقف وجـــود
يا تجود بده يا قلبي يا بده تجـــود
ما حد يقدر يبقي علي كل شـــئ
مع إن – عجبي – كل شئ موجود
عجبي !!!
ــــــــــــــــــــــــ
جالك اوان وعرفت مشي الجنايــــز
كيف شفتها يا عبد رب اللذايــــــذ
قال : شفت شيل بالحيل فقير أو اميـــر
كما شالوا في الخمامير فواضي القزايز
عجبي !!
ــــــــــــــــــــــــــ
أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي !!
أمل صلاح
11/16/2008, 03:07 AM
يا مشرط الجراح أمانة علــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
عجبي !!!
ــــــــــــــــــــ
كيف شفت قلبي و النبي يا طبيــــب
همد و مات و الا سامع له دبيـــب
قاللي لقيته مختنق بالدمــــوع
و ما لوش دوا غير لمسه من إيد حبيب
عجبي !!!!
ـــــــــــــــــــــــ
تسلم يا غصن الخوخ يا عود الحطــــب
بييجي الربيع .. تطلــــع زهورك عجب
و انا ليه بيمضــــي ربيع وييجي ربيع
و لسه برضك قلــــــــبي حتة خشب
عجبي !!!
أمل صلاح
11/16/2008, 03:08 AM
قلبي عليل يا ناس و في الكاس دواه
مديت له إيدي شربت م اللي حـــواه
جنبي الشمال خف .. اليمين اتــوجع
و إيه يداوي الكبد م اللي كـــــواه
عجبي!!
ــــــــــــــــــــــــــــــ
.. دي مزكرات و كتبتها من ســــنين
في نوتة زرقا لون بحور الحنيــــــن
عترت فيها .. رميتها في المهمـــــلات
وقلت صحيح أما صحيح كلام مخبولين
عجبي !!
ــــــــــــــــــــــ
دخل الشتا وقفل البيبان ع البــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمـــوت
عجبي !!
أمل صلاح
11/16/2008, 03:09 AM
- الدنيا من غير الربيع مـــيته
ورقة شجر ضعفـــانه و مـــفـــتــته
- لا يا جدع غلطان تأمل وشوف
زهر الشتا طالع فـــي عز الشـــتا
عجبي !!!
ـــــــــــــــــــ
ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كــبار
و ما لكش غير منقار و قادر تعيش
عجبي !!!!
ــــــــــــــــــــــــ
سمعت نقطة ميه جوه المحيـــــط
بتقول لنقطه ما تنزليش في الغويط
أخاف عليكي م الغرق .. قلـت أنا
ده اللي يخاف م الوعد يبقي عبيط
عجبي !!!
أمل صلاح
11/16/2008, 03:10 AM
بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!
ـــــــــــــــــــــــــــ
فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد و لسه رايح بعيد
عجبي !!
ـــــــــــــــــــــــ
كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي !!
أمل صلاح
11/16/2008, 03:10 AM
النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
عجبي !!!
ــــــــــــــــــــــــ
صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي !!!!
ــــــــــــــــــــــــــــ
كرباج سعاده وقلبي منه اجلد
رمح كأنه حصان و لف البلد
و رجع لي نصل الليل و سألني .. ليه
خجلان تقول انك سعيد يا ولد
عجبي !!!
أمل صلاح
11/16/2008, 03:12 AM
مزيكة هادية الكون فيها انغـــــمر
وصيف و ليل و عقد فل و سمر
يا هلتري الناس كلهم مبسوطين
و يا هلتري شايفين جمال القمر ؟
عجبي!!
ـــــــــــــــــــــ
إنشد يا قلبي غنوتك للجمـــال
و ارقص في صدري من اليمين للشمال
ما هوش بعيد تفضل لبكره سعيــــد
ده كل يوم فيه الف الف احتمـــــال
عجبي !!
ــــــــــــــــ
آه لو انا و محبوب جزنا الفضـــا
في سفينة وحدينا .. واشيا رضـــا
ساعة صفا تعجبنا نرجع لهــــا
و الهم قبل ما ييجي .. يبقي مضـى
عجبي !!
أمل صلاح
11/16/2008, 03:13 AM
أنا إله الوجد رب الهيـــــام
أضرب بسهم الوهم وهم الغــرام
و هم الغرام من كتر ما هو لذيـــذ
رشقت انا ف صدري جميع السهام
عجبي !!!
ـــــــــــــــــــ
حدوته عن جعران و عن خنفســـه
اتقابلوا حوا بعض ساعة مســــا
و لا قال لهم حد اختشوا عيب حــرام
و لا حد قال دي علاقة متدنســــــة
عجبي !!!!
ـــــــــــــــــــــ
ياللي عرفت الحب يوم و انطـــوي
حسك تقال مشتاق لنبع الهــــوي
حسك تقول مشتاق لنبع الغــــــرام
ده الحب .. مين داق منه قطره...ارتوي
عجبي !!!
أمل صلاح
11/16/2008, 03:13 AM
زحام و أبواق سيارات مزعجـــة
للي يطول له رصيف.. يبقي نجـــا
لو كنت جنبي يا حبيبي أنــــا
مش كنت أشوف إن الحياة مبهجة
عجبي!!
ـــــــــــــــــــــ
إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـترب
عجبي !!
ــــــــــــــــــــ
يا ميت ندامه ع القلوب الخـــــلا
لا محبة فيها و لا كراهــــــه ولا
حتي يا قلبي الحزن ما عادش فيــك
معلهش .. لك يوم برضه راح تتملا
عجبي !!
أمل صلاح
11/16/2008, 03:15 AM
مرحب ربيع مرحب ربيع مرحبـــــه
يا طفل يا للي ف دمي ناغا وحبـــا
علشان عيونك يا صغنن هويــــــت
حتي ديدان الأرض و الأغربـــــة
عجبي !!!
ــــــــــــــــــــــ
فتحت شباكي لشمس الصبـــــــاح
ما دخلش منه غيــــر عويل الريـــاح
و فتحت قلبي عشان ابوح بالألـــــــم
ما خرجش منه غير محبه و سمــــاح
عجبي !!!!
ـــــــــــــــــــــــ
غمست سنك في السواد يا قلـــــــم
عشان ما تكتب شعر يقطر ألــــــــم
مالك جرالك إيه يا مجنون ... و ليـــه
رسمت ورده وبيت و قلب و علـــم
عجبي !!!
أمل صلاح
11/16/2008, 03:16 AM
انا الذي عمري اشتياق في اشتيــاق
و قطر داخل في محطة الـــفراق
قصدت نبع السم وشربت ســــم
من كتر شوقي وعشمي في التريـــاق
عجبي !!!
ــــــــــــــــــــــــــ
انا الذي عشت الزمن مضيعـــه
بروح حزينة معفنة مضعضعــه
زرعت شجرة سنط لجل انجـــرح
لقتها شعر البنت و مفرعـــــه
عجبي !!
ـــــــــــــــــــــــــــــــ
لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شــــئ
انا كنت اجيب للدنيا ميت ألف ابـــن
عجبي !!
أمل صلاح
11/16/2008, 03:16 AM
العشب طاطا للنسايم و نــــــــخ
أخضر طري مالهش في الحســن أخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فـــخ
عجبي !!!
ــــــــــــــــــــــــ
أوصيك يابني بالقمر و الزهـــــــور
أوصيك بليل القاهرة المسحـــــور
و إن جيت في بالك .. إشتري عقد فل
لأي سمرا.. وقبري إوعك تـــــزور
عجبي !!!!
ــــــــــــــــــ
غمض عينيك و ارقص بخفة و دلع
الدنيا هي الشابة و انت الـــجدع
تشوف رشاقة خطوتك تعبــــدك
لكن انت لو بصيت لرجليك ....تـقع
عجبي !!!
أمل صلاح
12/05/2008, 02:06 AM
حاسب من الاحزان و حاســـب لها
حاسب علي رقابيك من حبلــــــها
راح تنتهي و لابد راح تنتهــــــي
مش انتهت أحزان من قبلهـــــا؟
عجبي !!!
ــــــــــــــ
يأسك و صبرك بين إيديك و انت حر
تيأس ما تيأس الحياه راح تـــــمر
أنا دقت مندا ومندا عجبي لقيـــت
الصبر مر و برضك اليـأس مـــر
عجبي !!
ـــــــــــــــــ
ولدي نصحتك لما صوتي اتنبــــح
ما تخفش من جني و لا من شبـــــح
و ان هب فيك عفريت قتيل إسألــــه
ما دافعش ليه عن نفسه يوم ما اندبح
عجبي !!
أمل صلاح
12/05/2008, 02:08 AM
ولدي إليك بدل البالون ميت بالــون
انفخ وطرقع فيه علي كل لــــــون
عساك تشوف بعينك مصيرالرجـــال
المنفوخين في السترة و البنطلـــون
عجبي !!!
ــــــــــــــ
خوض معركتها زي جدك ما خـاض
صالب و قالب شفتك بامتـــعاض
هي كده...ما تنولش منها الأمــــل
غير بعض صد ورد ووجاع مخاض
عجبي !!!!
ـــــــــــــــــ
كام اشتغلت يا نيل في نحت الصخور
مليون بئونه و الف مليون هاـــتور
يا نيل أنا ابن حلال و من خلفتــك
و ليه صعيبه علي بس الأمــــور
عجبي !!!
أمل صلاح
12/05/2008, 02:21 AM
منين أجيبها كلمه متألمــــــــة
لعيبه فايره حايره و مصممـــــه
منين اجيبها كلمه تكون بنـــت ارض
تشفي اللي ما شافهوش كلام السمـا
عجبي !!!
أنا قلت كلمة و كان لها معنييـــن
كما بطن واحده و توأمين زي وشين
لو دنيا شر.. التوأم الخير يمـــوت
لو دنيا خير .. الشر ح يعيش مــنين
عجبي !!
أنا اللي بالأمر المحال اغتـــــوي
شفت القمر نطيت لفوق في الهــوا
طلته ما طلتوش إيه انا يهمنــــي
و ليه .. ما دام بالنشوة قلبي ارتوي
عجبي !!
أمل صلاح
12/05/2008, 02:23 AM
بره القزاز كان غيم و أمطار و بــــرق
ما يهمنيش – أنا قلت – و لا عندي فرق
غيرت رأيي بعد ساعة زمـــــــان
و كنت في الشارع .. و في الجزمة خرق
عجبي !!!
عيني رأت مولود علي كتف أمــــه
يصرخ تهنن فيه يصرخ تضــــــمه
يصرخ تقول يا بني ما تنطق كــــلام
ده اللي ما يتكلمش يكتر همــــــه
عجبي !!!!
يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــا
كتم الغنا هو اللي ح يموتـــــك
عجبي !!!
عماد تريسي
02/19/2009, 07:14 AM
طال انتظاري للربيع يرجــــــــــــــع
و الجو يدفا و الزهور تطلــــــــــــع
عاد الربيع عرمرم شبـــــــــــــــاب
إيه اللي خلاني ابتديت افــــــــزع ؟
عجبي !!!
عماد تريسي
02/19/2009, 07:15 AM
و لو انضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط
عجبي !!
عماد تريسي
02/19/2009, 07:17 AM
عاد الربيع كأنه طعم الحــــــــــــــــــب
و الحب نار جوه العروق بتصـــــــــب
اتمتع ازاي بيه وانا متقطـــــــــــــــع
من كتر خوفي لا في الخطيئة يطب ؟
عجبي !!
عماد تريسي
02/19/2009, 07:18 AM
ازاي شبابنا يقوم و ياخـــــــــد دوره
من غير صراخ يئذيه و يجرح زوره
يا هلتري أحسن له يقعد ساكـــــــــت
أو ينترك و لو خرج عن طــــــوره ؟
عجبي !!!
عماد تريسي
02/19/2009, 07:19 AM
احسن ما فيها العشق و المعشقــــــة
و شويتين الضحك والتريقـــــــــــــة
شفت الحية . لفيت . لقيت الألــــــــذ
تغييرها . و ده يعني التعب و الشقا
عجبي !!!
عماد تريسي
02/19/2009, 07:21 AM
عجبي على العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبي !!!
عماد تريسي
02/19/2009, 07:22 AM
في الهو ماشي يا بهلوان إش إِش
يا فراشة منقوشة علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي !!
عماد تريسي
02/19/2009, 07:23 AM
وقفت ساعة الصبح باغسل سناني
قالت لي شايف قوتي و لمعاني ؟
إيش تطلب اليوم مني ضحكة أسد ؟
والا ابتسامة اعلانات أمريكاني ؟
عجبي !!
عماد تريسي
02/19/2009, 07:24 AM
الحلو يم اليم صابــــــــــح رايح
سارح في حضن الميه سابح سايح
الحلو داب في البحر , قلــــت أدوقه
وجدت لسه البحر برضك ماــــــلح
عجبي !!!
عماد تريسي
02/19/2009, 07:25 AM
يا كل كلمة للعجب في قامــــــــــــوس
انسكلوبيديا لسان العرب أو لا لاروس
تعالوا نجدة . ده لسه في عصـــــرنا
الشمس و البحر العريض بالفـــلوس
عجبي !!!!
عماد تريسي
02/19/2009, 07:27 AM
ما آنتاش بتلعب ليه يا روح بابــــا ؟
و لا عسكري و لا لص في عصابة ؟
إلعب أسد أو ديب رهيب أو غـــــزال
دي الدنيا في نهاية المطاف غابـــــة
عجبي !!!
عماد تريسي
02/19/2009, 07:28 AM
الموج تلول تهبط وتطلع تلــــــــــــول
يا بحر خدني الشط صاحبك ملـــــــول
و الا بلاش الشط ح اعمل به أيـــــــه
ده ريحته طحلب مهري و ام الخلــول
عجبي !!!
عماد تريسي
02/19/2009, 07:29 AM
ورد في ورق سلوفان يا حلوة اهديلك ؟
و الا انقله بالطين في الشتلة و اجيلـــــك
الأولاني لو وحا بحنــــــــــــــــــــــانــي
عجبي علي التاني بإيــــــــه يوحيلــــــــك
عجبي !!
عماد تريسي
02/19/2009, 07:31 AM
أنا قلبي كوكب و انطلق في المدار
حواليكي يا محبوبتي يا نور ونـــار
يلف مهمــــا يلف ما بيكتفــــــفيش
وتمللي نصه ليل و نصه نهــــــــار
عجبي !!
عماد تريسي
02/19/2009, 07:32 AM
الأرض شوك أيوه لكين هايش
و الحمرة مش يعني الطريق حايش
دي دمنا السيال .. وبشرة خيـــــــر
ان انتي عايشة و ان كنت أنا عايــش
عجبي !!!
عماد تريسي
02/19/2009, 07:33 AM
إيه اللي خدته من مرور السنــــــين
يا قلبي الا دمعتك و النيــــــــــــــين
بتئن و ترجع و بتفرح و ترجع تحــن
مع إن مش كل البشـــــــــــر فرحانين
عجبي !!!!
عماد تريسي
02/19/2009, 07:35 AM
اوقات أفوق و يحل عني غبــــــــــايا
واشعر كأني فهمت كل الخبايـــــــــــا
و افتح شفايفي علشــــــان اقول الدرر
ما أقولش غير حبة غزل في الصبايــــا
عجبي !!!
عماد تريسي
02/19/2009, 07:36 AM
عيني رأت مخلوق في غاية البشاعة
أنا قلت له لما تأملته ساعـــــــــــــة
اللذه و الموت علموك اللــــــــــزج
و انا علموني الفلسفة و الشجاعــة
عجبي!!
عماد تريسي
02/19/2009, 07:37 AM
غطس وقب الموج نهود بمبي
من ألف جيل جمالات ما تعلم بي
يا قلبي عيب دول امهاتنا القدام
أستغفر الله العظيم ربـــــــــــــي
عجبي !!
عماد تريسي
02/19/2009, 07:39 AM
علقت في المسمار قناع مهزلة
ومعاه قناع مأساة بحزنه ابتـــلا
بصيت لقيتهم يشبهوا بعضهـــم
واهو ده العجب يا ولاد و الا فلا
عجبي !!
عماد تريسي
02/19/2009, 07:40 AM
ظهر المسيح الحي علي سفح ربـــــــــوة
و نزل بهالة الضي و قعد في قهـــــــــوة
بصوا .. تعالوا .. قالوا خليه في حالــــــــه
الناس في حالهم يا بني .. مالهمش دعوة
عجبي !!!
عماد تريسي
02/19/2009, 07:41 AM
يا وردة قلبي معاكي في الريح لعب
لا تعبتي م الريح و لا قلبي تعــــــــب
احنا كده : نرتاح في صخب الجنون
و في السكون بنخاف قوي و نترعب
عجبي !!!
عماد تريسي
02/19/2009, 07:42 AM
لولا اختلاف الرأي يا محـــــترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي !!!!
عماد تريسي
02/19/2009, 07:44 AM
مركب ورق من نفخة تتطـــــــــوح
ركبتها و الكل بيــــــــــــــــلوح
سوحت فيها اتنين و خمسين سنــــه
للآن ..... و لا بتغرق و لا تـــــروح
عجبي!!
عماد تريسي
02/19/2009, 07:45 AM
عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب
عجبي !!
عماد تريسي
02/19/2009, 07:46 AM
يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟
عجبي !!
عماد تريسي
02/19/2009, 07:48 AM
قاعدة قناني الخمر ساكتة و ساهية
مع ابن آدم في الشبه متناهيـــــــــــة
مفيش كده روقان في لحظة تشوفهم
و بعدها بلحظه يودوا في داهيــــــه
عجبي !!!
عماد تريسي
02/19/2009, 07:52 AM
حتة محارة وجدتها في يوم لقيـة
قالت لي شوف كيف الطبيعة شقية
نظرت للكهف اللي فيها و لقيــــت
إن الطبيعة كمان لا أخلاقيــــــــــة
عجبي !!!!
عماد تريسي
02/19/2009, 07:54 AM
بلياتشو قال إيه بس فايدة فنونــــي ؟
و تلات وقق مساحيق بيلونونـــــــي
و الطبل و المزامير و كتر الجعـــــــير
إذا كان جنون زبوني زاد عن جنوني
عجبي !!!
عماد تريسي
02/19/2009, 07:55 AM
نقطة مرارة كمان علي مشروبـــــــــــي
دوبها يا ساقي حسب مطلوبـــــــــــــــي
طعب الحياة .. مش برضه فيها و فيها ؟
ليالي وردي و نهارات خروبــــــــــــي ؟
عجبي!!
عماد تريسي
02/19/2009, 07:57 AM
عيد و العيال اتنططوا ع القبـــــــور
لعبوا استغمايه .. و لعبوا بابــــــور
و باللونات و نايلونات شفتشـــــــي
و الحزن ح يروح فين جنب السرور
عجبي !!
عماد تريسي
02/19/2009, 07:58 AM
الضحك قال يا سم ع التكشيـــــــر
امشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيــر
عجبي !!!!
عماد تريسي
02/19/2009, 07:59 AM
أهوى الهوى و همس الهوى في العيون
وبسمة المغرم ودمعه الحنـــــــــــــــون
و زلزلات الحب نهد الصبـــــــــــــــــــــا
أكون انا المحبوب أو لا أكــــــــــــــــون
عجبي !!!
عماد تريسي
02/19/2009, 08:01 AM
وسط الحطام اتفرجوا يا أنـــــــــام
تمثال ملك . و مبوله م الرخــــــام
لتنين نحتهم نفس أسطي الحجــــر
و كانوا ذات يوم كتلتين لسه خــام
عجبي !
عماد تريسي
02/19/2009, 08:02 AM
يا ملونين البيض في شم النسيـــــم
لون الحنين و الشوق و خمر النديم
ما تعرفوش سايق عليكو النبــــــي
تلونوا الأيام بلون النعيــــــــــــــم ؟
عجبي!!
عماد تريسي
02/19/2009, 08:04 AM
الدنيا صندوق دنيا .. دور بعــــد دور
الدكة هي .. و هي كل الديكـــــــــور
يمشي اللي شاف ويسيب لغيره مكان
كان عربجي أو كان امبراطــــــــور
عجبي !
عماد تريسي
02/19/2009, 08:05 AM
قطي العزيز راقد على الكنبــــــات
في نوم لذيذ .. و بيلحس الشنبات
و انا كل عين فنجان مدلدق قلــق
صدق اللي قال إن الحياة منابات
عجبي !!
عماد تريسي
02/19/2009, 08:07 AM
قالوا السياسة مهلكة بشكل عـــــــــــام
و بحورها يا بني خشنة مش ريش نعام
غوص فيها تلقي الغرقانين كلهــــــــــم
شايلين غنايم .. و الخفيف اللي عـــــام
عجبي !!!
عماد تريسي
02/19/2009, 08:13 AM
سلام سلام سلام سلام ... سلام
كلام كلام كلام كلام ... كلام
هز الورق يا صاحبي كدهــــوه
يطلع كلام سلام .. و سلام كلام
عجبي !!!!
عماد تريسي
02/19/2009, 08:15 AM
فوق تحت . ورا قدام . يمين شمـــال
في الجو . تحت الميه . أو في الرمال
طلب الكمال يحرم علي الممـــــــــكن
و الممكنات دول محرومين م الكمال
عجبي !!!
عماد تريسي
02/19/2009, 08:17 AM
هات يا زمان و هات كمان يا زمان
غير بسمة الشجعان مامني يــــبان
هو اللي داق الفرحة يوم ثورتـــــه
يقدر يعود و لا ثانية للأحــــــزان ؟
عجبي!!
عماد تريسي
02/19/2009, 08:20 AM
عبثا باقول واقرا في سورة عبس
ماتلومش حد إن ابتسم أو عبس
فيه ناس تقول الهزل يطلع جــــد
و ناس تقول الجد يطلع عبـــــث
عجبي !
عماد تريسي
02/19/2009, 08:21 AM
يومي على الله تنتهي و تغيــــب
الشمس و تعود تاني يوم لهاليب
زي الحياة مأساه و من كترهــــا
بقي لا انتهاءها و ابتداءها عجيب
عجبي !!
عماد تريسي
02/19/2009, 08:23 AM
علم اللوع اضخم كتـــــــــاب في الأرض
بس اللي يغلط فيه يجيـــــــــبــه الأرض
أما الصراحة فأمرها ســـــــــــــــــاهل
لكن لا تجلب المال و لا تصون العرض
عجبي !!!
عماد تريسي
02/19/2009, 08:24 AM
قالوا ابن آدم روح و بدنه كفـــــــــــن
قالوا لأ بدن . قالوا لأ ده روح في بدن
رفرف فؤادي مع الرايات في الهــــــوا
أنا قلت لأ روح في بدن في وطــــــــن
عجبي !!!
عماد تريسي
02/19/2009, 08:25 AM
أنا كان لي أب . و كان رئيس محكـــمه
ستين سنة .. في قضية واحدة أترمي
ستين سنة و طلع براءة و خــــــــرج
يشكي الحياة و الموت لرب السمـــــا
عجبي !!!!
عماد تريسي
02/19/2009, 08:29 AM
الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..
ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …
ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس
عماد تريسي
02/19/2009, 08:31 AM
احـنا العـمال اللى انقـتلوا
قـدام المصنع فى ابو زعبل
بنـغـنى للدنـيـا ونـتـلو
عناوين جرانـين المستـقبل:
"وحـدة صـف الأحـرار"
"جـبـهـة لكـل الثـوار"
"عـبور الجـيـش لسـينا"
"الـزحف مـن الأغـوار"
"جـيش العـدوان يتقـهقر"
"الأرض قــايـدة نــار"
"والبـحر قـايـد نــار"
"الاستـعمار أثـبت فشـله"
"البـيت الأبيض لا يخجل"
"إحـنا العـمال اللى انقتلوا"
"قدام المصنع فى أبو زعبل"
بـنـغـنى للدنـيا ونتـلـو
عنـاوين جرانـين المستقبل:
"محـكـمة للـمـجرمـين"
"قائــمة بالمـتـهـمـين"
"إدانـة مسـتر نيـكسون"
"بقـتل الاسـطى ياسـين"
"القــاتل اسـتـعـمارى"
"القـتـلـى وطنــيـين"
"عـمــال مـدنـيـيـن"
"نـصارى ومسـلـمـين"
"مرتكبو المذبـحة يعتـقلوا"
"الحـكم عـى المتهم الأول"
احـنا العـمال اللـى انقتلوا
قـدام المصنع فى ابو زعبل
بـنـغـنى للدنـيا ونتـلـو
عنـاوين جرانـين المستقبل:
"الجـو غــدا يتحـسـن"
"معرض لزهور السـوسن"
"الخطـة الخـمسية تنـفذ"
"مهرجانات النـصر غـدا"
"تصـفـية الصهـيونـية"
"دولـة فلسطين .. تعـلـن"
"دستور وقوانين .. تعـلـن"
"حريـة الدين .. تعـلـن"
"قوس تذكارى جارى عمله"
"طالين منه احنا وح نفضل"
احـنا العـمال اللـى انقتلوا
قـدام المصنع فى ابو زعبل
بـنـغـنى للدنـيا ونتـلـو
عناوين
جرانين
المستقبل
عماد تريسي
02/19/2009, 08:33 AM
مرغم عليك يا صُبح مغصوب يا ليل
لادخلتها برِجْليَّا ولا كانلي ميل
شايلنِّي شيل دخلت انا في الحياة
وبكره ح اخرج منها شايلِّني شيل
عجبي !!
عماد تريسي
02/19/2009, 08:34 AM
عجبي عليك .. عجبي عليك يا زمن
يا بو البِدَع يا مبكِّي عيني دَماً
إزاي أنا أختار لروحي طريق
وأنا اللي داخل في الحياة مرغماً
عجبي !!
عماد تريسي
02/19/2009, 08:36 AM
سنوات وفايته عليّا فوج بعد فوج
واحدة خَدِتني إبن والتانية زوج
والتالتة أَب خدتني والرابعة إيه
إيه يعمل إللي بيحْدفُه موج لموج ؟
عجبي !!
عماد تريسي
02/19/2009, 08:37 AM
وأنا في الضلام .. من غير شعاع يهتكه
أَقف مكاني بخوف ولا أتركه
ولما بيجي النور وأشوف الدروب
أحتار زيادة .. أيهم أَسلكه ؟
عجبي !!
عماد تريسي
02/19/2009, 08:39 AM
نظرت في الملكوت كتير وانشغلت
وبكل كلمةْ ( ليه ؟ ) و ( عشانيه ) سألت
اسأَل سؤال .. الرد يرجع سؤال
واخرج وحيرتي أشد مما دخلت
عجبي !!
عماد تريسي
02/19/2009, 08:40 AM
غَدْر الزمان يا قلبي ما لهوش أمان
وحاييجي يوم تحتاج لحبَة إيمان
قلبي ارتجف وسأَلني .. أَأَمِن بإيه ؟
أَأَمن بإيه محتار بقالي زمان
عجبي !!
عماد تريسي
02/19/2009, 08:42 AM
كان فيه زمان سِحليَّة طول فَرْسَخين
كهفين عيونها وخَشْمَها بَرْبخين
ماتت .. لكين الرعب لم عمره مات
مع إنه فات بدل التاريخ تاريخين
عجبي !!
عماد تريسي
02/19/2009, 08:43 AM
كل اللي في الخمّارة صابهم جنون
صبحوا الرجال يتبادلوا كاس المنون
وبْدمّ ونبيت انكتب ع الجدار
" يا ميت ندامة ع اللي قلبه حنون "
عجبي !!
عماد تريسي
02/19/2009, 08:45 AM
يوم قلت آه .. سمعوني قالوا فَسَدْ
ده كان جدع قلبه حديد واتحسد
رديت على اللايمين أنا وقلت .. آه
لو تعرفوا معنى زئير الأسد
عجبي !!
عماد تريسي
02/19/2009, 08:46 AM
قالوا الشقيق بيمُصّ دم الشقيق
والناس ما هيَّاش ناس بحق وحقيق
قلبي رميته وجبت غيره حجر
داب الحجر ... ورجعت قلبي رَقيق
عجبي !!
عماد تريسي
02/19/2009, 08:48 AM
بين موت وموت .. بين النيران والنيران
ع الحبل ماشيين الشجاع والجبان
عجبي عَلادي حياة .. ويا للعجب
إزاي أَنا - يا تخين - بقيت بهلوان
عجبي !!
عماد تريسي
02/19/2009, 08:50 AM
دخل الربيع يضحك لقاني حزين
نده الربيع على إسمي لم قلت مين
حط الربيع أزهاره جنبي وراح
وإيش تعمل الأزهار للميتين
عجبي !!
عماد تريسي
02/19/2009, 08:56 AM
أنا قلبي كان شخشيخة أصبح جَرس
جلجلت به صحيوا الخدم والحرس
أنا المهرج .. قمتو ليه خفتو ليه
لا فْ إيدي سيف ولا تحت منى فرس
عجبي !!
عماد تريسي
02/19/2009, 08:58 AM
مهبوش بخربوش الألم والضياع
قلبي ومنزوع م الضلوع انتزاع
يا مرايتي يا اللي بترسمي ضحكتي
يا هلترى ده وش والا قناع
عجبي !!
عماد تريسي
02/19/2009, 08:59 AM
ليه يا حبيبتي ما بيننا دايماً سفر
ده البعد ذنب كبير لا يُغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!
عماد تريسي
02/19/2009, 09:01 AM
حبيت .. لكن حب من غير حنان
وصاحبت لكن صُحبه ما لهاش أمان
رحت لحكيم واكتر لقيت بلوتي
إن اللي جوّه القلب مش ع اللسان
عجبي !!
عماد تريسي
02/19/2009, 09:02 AM
- الدنيا من غير الربيع ميّته
ورقة شجر ضعفانه ومفتفته
- لأ يا جدع غلطان تأمّل وشوف
زهر الشتا طالع في عز الشتا
عجبي !!
عماد تريسي
02/19/2009, 09:04 AM
يا للي انت بيتك قش مفروش بريش
تقوى عليه الريح . يصبح مفيش
عجبي عليك حواليك مخالب كبار
وما لكش غير منقار وقادر تعيش
عجبي !!
عماد تريسي
02/19/2009, 09:05 AM
حقرا وفوق كوكب حقير محتقر
في الكون تكون دنياكو إيه يا بَقَر
رملايه من صحرا ؟ .. لكين إيش تقول
والكون بحاله جوّه عقل البشر
عجبي !!
عماد تريسي
02/19/2009, 09:07 AM
يا للي بتبحث عن إله تعبده
بحث الغريق عن أي شيء ينجده
الله جميل وعليم ورحمن رحيم
إحمل صفاته ... وانت راح توجده
عجبي !!
عماد تريسي
02/19/2009, 09:09 AM
لا تجبر الإنسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره
عجبي !!
عماد تريسي
02/19/2009, 09:10 AM
يا للي ف حماه الشمس تلقى الملاذ
وألف بكره وبكره ... في ضلوعه لاذ
مين انت ؟ مارد ؟ رب ؟ قال لأ ده بس
انا اللي باروي القمح واسقي الفولاذ
عجبي !!
عماد تريسي
02/19/2009, 09:12 AM
البط شال عدَّى الجبال والبحور
ياما نفسي اهجّ ... أحج ويا الطيور
أَوصيك يا ربي لما أموت ... والنبي
ما تودّنيش الجنة ... للجنة سور
عجبي !!
عماد تريسي
02/19/2009, 09:14 AM
غسل المسيح قدمك يا حافي القدم
طوبى لمن كانوا عشانك خدم
صنعت لك نعليك أنا يا أخي
مستني إيه .. ما تقوم تدوس العدم
عجبي !!
عماد تريسي
02/19/2009, 09:16 AM
عيني رأت عصفور ووياه ابنه
بيحدفه في الريح وياخده ف حضنه
نوبتين وتالت نوبه - عجبي عليهم -
كانوا سوا بيرفرفوا ويغنوا
عجبي !